كيفاش تبيع مشطة للقرع👩‍🦲: مبقاتش فالمشطة، ولاكين فهاد 3 ديال اللعيبات ؟

 تخيل معايا هاد الفيلم : أنت جالس مكسل مع ديك الجوج د الليل كتسكرولي ،واحد العين فلانسطا ولخرى كتقلب على المنطا ههه.

تا طلع ليك إعلان لواحد الريحة(Parfum) دكشي هارب، القرعة كتشعل كي الثرية دجامع ....واحد خينا لابس كوستار كيقوبلي الريحة عند ها "بصمة خاصة" مايمكنش تنساها. و هادي هي الريحة اللي غتخليك تدخل لأي بلاصة ...بنادم يضرب ليك التحية. نتا أصلاً عزيز عليك "التبقشيش" في الروايح والعيد صغير قرب قلتي : ارا نشوفو هاد خينا اشكي كايخربق .

ومن هنا غتبدا رحلة ديالنا باش نفهمو علاش غدي تقرر تشري هد الريحة قبل ماتمشي تنعس وكيفاش تخدم هد لاستراتيجية دال psychological triggers المحفزات النفسية باش تخلي أي واحد يدوز من نفس التجربة ويشري من عندك فالبلاصا؟ يعني كفاش تبيع المشطا اللقرع ملخر

1. عند غاتاك , ماعندكش غاتكل (Price Anchoring)

كتدخل للموقع، أول حاجة كتلقى هي "الباك الملكي محلقين عليعه فيه الريحة وشي تويشيات " بـ 3500 درهم. نتا هنا كتقول "وايلي! هدشي غلي ؟".. 💸

ولكن مباشرة تحتها، كتلقى "الباك الأساسية الريحة بوحدها نفس الماركة بنفس الجودة" بـ999 درهم. هنا كترتاح وكتبان ليك تسعمية درهم مزيانة مقرانتا بالثمن الأول وهادشي كيرجع لأن عقلنا مبرمج منهار قلنا بسم الله فهد الأرض السعيدة باش ييعرف القيمة ديال أي حاجات بالمقارنة ديلها بحاجة خرى حيتاش ببساطة الدماغ ديالنا معندوش مصطرة ولا ميزان باش يعرف القيمة بضبط ديال الحاجة فجدودنا كنو كيعرفو واش اليوم بارد ولا سخون بالمقارنة ديالو بالبارح ولا واش هد الحجرة تقيلة بالمقارنة ديالها بوحداخفيفة.

وبالتالي: حنا ورتنا هد السلوك ولينا كنديوه بطريقة غير واعية هادشي علاش المرة الجاية فاش تبغي تسوق لشي منتوج، ضروري تحط خيار "بريميوم" غالي باش الخيار اللي بغيتي تبيعو فعلياً يبان رخيص .

والى لو مادرتيش هكا، الكليان غيشوف ثمنك غالي حيتاش ماعندو باش يقارنو وغيمشي يقلب عند المنافسين ديالك ، غير هو رد بالك من واحد الغلط كيتعود بزاف وهو أنك تحط فرق ثمن خيالي وغير منطقي بين جوج دليباك حيتاش تقدر تخلي الكليان يشك في المصداقية ديالك.

2. "مادام كولشي كلمنو تنا نقول بالسم الله " (Social Proof) 🤝

ملي ولات عندك فكرة على الثمن، كيدخلك داك الوسواس ديال واش هاد الريحة زوينة بصح . كتهبط لتحت وكتلقى "الروينة نايضة" في التعليقات واحد كاتب: نهار درتها وقفني بوليسي سولني عليها .ههه راش الويسكي هدا ههه.

المهم.... , لاراء ديول الناس وتجارب ديالهم عبارة على واحد الدليل اجتماعي" كي عطيك راحة نفسية وكينقص عليك التردد والخوف من أنك تضيع فلوسك في حاجة مخدماش لأننا كبشر كائنات اجتماعية، وفزمان لو شفتي مجموعة ديال الناس كتاكل من واحد الشجرة كتعرف بلي الغلة ديالها مزيانة وممسموماش ، وهادشي كينقص علينا "خطر التجربة".

وبالتالي: هد السلوك ورتناه تهوا وكانديروه بالا من عيقو . فباش تخدم بهاد التكنيك، لازم ديما تبين شهادات الكليان وصور حقيقية للمنتوج ديالك وسط الناس، لأنك لو مادرتيش هكا الكليان غيخاف يغامر بفلوسو .

رد بالك: أكبر غلط ممكن تطيح فيه هنا هو تستعمل تعليقات كتبان مصطنعة وفيها بزاف دصباغة ، لأن الكليان دابا ولا ذكي وكيقدر يعيق بلي التعليقات ماشي حقيقية، وهادشي كيقتل الثقة تماماً.

3. مول المليح باع وراح (الـ FOMO) 🏃‍♂️

دابا الريحة عجباتك، والثمن جاك هو هاداك، والناس شكروا ها .. ولكن جاك العكز وقلتي "نخليها حتى لغدا دبا غنتلاح نعس".

شوية كيبان ليك ميساج بلاحمر: "باقي 3 حبات فقط....و 47 واحد كيشوفو هاد الباج دابا!"

هنا كتقول خيرنا ميديه غيرنا وكتلوح يديك على لكارت وكت كموندي بالخف ، حيتاش حسيتي بواحد "الخوف" بسيط أنك تفقد هاد الفرصة وتباقا شهر اخر ونتا غي كتسنى, هادا كيتسما الخوف من ضياع الهمزة. وهاد الغريزة خلات جدودنا يحافظوا على الموارد لكانت قليلة بزاف ومهمة بحال الماء أو اللحم فيلا سبقهم ليها شي حد آخرغي خليهم بجوع وتقدر متبانش فرصة خرا على شحال.

وبالتالي: عقلنا مازال كيشوف إن "الحاجة اللي غتسالى قيمتها عالية ومهمة بزاف. فالمرة الجاية فاش تبغي تبيع ،دير كمية محدودة من البرودوي أو وقت قصير للعرض باش تعطي دفعة للكليان المتردد ويشري منعندك ديك السعات نيت ، والى مادرتيش هكا، الكليان غيأجل الشرا وغينسى الموضوع بالمرة وسط الصداع د الحياة وغضيع عليك البيعة.

وأهم حاجة هي تجنب الـ FOMO العيان، بحال هادوك الكرونو اللي كيرجعوا للزيرو فاش كتدير "Refresh" للصفحة، لأن هاد الحركة كتبينك ماشي بروفيسونيل وكتخلي الكليان يهرب.

نتمنى تكون خدتي ولو Value بسيطة من هاد المقال. المحفزات النفسية راه Game كبيرة، وأقصر طريق باش تفهمها هي بالPractice وتشوف النتيجة بعينيك يلا وصلة لهنا متنساش تبان لتحت فالكمونترات ,,,,تحياتي نشوفكم فالبوست الجاي 🐱‍👤