سيكولوجية الأجيال: كفاش تبيع البابوش... أونلاين 👌

فالماركتينغ ديال اليوم، مابقاش كافيك تعرف غير "العمر" ديال الكليان، خاصك تفهم "الجيل" ديالو (Generational Cohorts) باش تضرب ليه على الوتر الحساس وتبيع ليه بنجاح.

حتاش إلى خلطتي بيناتهم، بحال إلى كتبيع "الببوش" لواحد كابر بدانون والفرماج.. غيجرجرك! غير باش تقنعو يدوق واحد خلي عليك تبيع ليه؟

1. جيل "البيبي بومرز" (1946 - 1964): صحاب الهمّة والشان

هو داك "الحاج" اللي كيمشي يشري "مرسيدس 240" خضرا، ما عمرو بدل الحلاق وكيشري نفس الماركة ديال "اتاي" هادي 40 عام. بالنسبة ليه، الماركة هي "السمية" و "العشرة".

• كفاش تبيع ليه؟
• هاد الجيل مكيشريش "برودوي"، كيشري "التقدير". خصوا يحس براسو VIP.
• إلى عطيتيه "كادو" رمزي ولا "كارت د فيديلتي" فيها سميتو، راك ربحتيه.
• بيع ليه "البرستيج"، الجودة، الكارانتي، والكلمة، حتاش هاد الجيل كيربي الكبدة على الماركة.

2. جيل X (1965 - 1980): جيل "ما تقلبنيش"

هو داك خالك اللي قبل ما يشري "تلفزة"، كيقلب عليها في 10 ديال الحوانت، ويسول "المعلم" ويقول لولدو قلب عليها فلانترنيت . مكيتيقش في الإشهارات ديال "دوزيم".. غالباً كيقول عليهم داكشي غير كدوب.

• كفاش تبيع ليه؟
• هادو هوما جيل "الشطارة وقصوحيت الراس". كيسولك نيشان: "بشحال؟ وشنو غنربح؟".
• مكاتمشيش معاهم الهضرة المعسولة وحلاوة لسان، كيبغيو الأرقام والضمانات.
• دوي معاه نيشان وعطيه "المعقول" ولاش غي نفغو هاد البرودوي .و إلى قلتي ليه "هذا جلد"، خاصو يكون جلد حقيقي، وإلا غيدير عليك "X".

3. جيل الألفية (1981 - 1996): أصحاب "الڤايب" و"صورني نلوحها"

هو داك الشباب اللي كيمشي لقهوة غالية غير حيت "الديكور" ناضي باش يتصور ويلوحها بوست في Instagram. كيشري جيتار غير باش يعيش داك "الفايب" وديك "لكسبييريونس" ديال يطرب صحابو فلافاك.. "ويا البيضا مون أمور" ههه.

• كفاش تبيع ليه؟
• هاد الجيل كيشريو "المعنى" والقصة. مكيشريش "قهوة"، كيشري "تجربة".
• كيموتو على البراندات اللي عندها "قضية" واللي غتخليه يعيش ستوري جديدة.
• بخلاصة: بيع ليه "لي سطوري" و"الإكسبيريونس". خدم مع "المؤثرين" ووريه باللي البرودوي ديالك غيخلي حياتو عندها "ستيل" وزينة في التصاور.

4. جيل Z (1997 - 2012): جيل...ما عرت... عطوني شي سمية فالتعاليق؟

هادو زادو والويفي خدام والكونيكسيون موجودة، أرى برع! جيل عايش بـ "السكرول"، إلى مكانش فتيكتوك غيكون فانستاغرام.

• كفاش تبيع ليه؟
• هاد الجيل طلعوا ليه الإعلانات فراسو، فبالتالي ربا مناعة ضدهم.
• عندك معاه 8 ديال الثواني: يا غتاكل يا مغاتاكلش! إلى مفهمش الفكرة دغيا، كيدير "Scroll" ويمشي بحالو.
• كيكرهو الإشهارات اللي فيها "الزواق"، وكيبغيو شي حاجة كتبان طبيعية وعفوية.
• غتبيع ليه بفيديو د 15 ثانية عفوي فيه موسيقى "توندونس". أو فوت عليك الرسميات؛ خاصك تبان نتا هو داك "الصاط" اللي بحالهم وكتهضر بلغتهم.
• الإشهار خاصو ما يبانش إشهار، خاصو يبان "محتوى".

ويلا وصلة لهنا راك ناضي متنساش تبان لتحت فالكمونترات ,,,,تحياتي نشوفكم فالبوست الجاي 🐱‍👤