كيفاش "عايدة" كتطيح لكليان غي بالهدرة وبلا صداع الراس💖؟

ها واحد السلام عليكم ,كاملين كنشوفو داك خونا اللي كيكون غادي فـ الزنقة لابس قميجة، ولكن كتبان بحال إلا كان ناعس بيها فالتبن. ونتا كميديا باير ولا ماركتر حاضي شغلو، خاصك تعرف كيفاش تلعب على هاد البلان...

👈 Attention

أول حاجة غديرها هي غتحط صبعك على الدبرة وغتقول ليه:

"عييتي ما تصلح وتعاود فهاد الشرويط، وفالآخر كتبان بحال إلا طيحوك المسلمين؟"

هنا جرتيه لعندك، حيت قستيه فـ "الإيجو" ديالو وشديتيه من اليد اللي ضراه.. يعني بحال داك خالك اللي كيخليك تال قدام العائلة ويقوليك: "شنو سميت النعامة بالفرونسي؟" 🦆 (أودي وأودي على الباك هههه).

المهم، فهاد المرحلة خاصك تكسر الروتين باش تربح "لاطونسيون" ديال الكليان.

👈 Interest

ودابا ملي حبس "السكرولينغ"، خاصك تخليه يقول "واو!". فهنا غتزرب عليه وغتقول ليه:

"واش خبارك بلي كاين واحد النوع ديال الثوب سميتو 'المسكون'؟ هاد الثوب ما كيتكمشش وخا تنعس بيه فوق الربيع، وكيبقى ديما 'واقف' بحال العسكري!"

هنا الكليان كيبدا يحل عينيه ويقول: "أويلي، هادشي واش بصح ولا غير كيكذبو عليا؟". المهم هنا هو أنك تطيتيه معلومة ناضية تخليه يبغي يعرف كتر.

👈 Desire

هنا غتخدم ليه على "الخيال ديالو". غتقول ليه:

"تخيل راسك داخل لشي إدارة ولا شي بانكا، لابس قميجة مكمشة ومبهدلة، كيشوفوا فيك بحال إلا جاي تطلب. ولكن، فاش كتكون لابس قميجة مورقة على حقها وطريقها، غتسمع غا 'نعام سيدي'!"

أهم حاجة فهاد المرحلة هي تخلي لكليان يتخيل راسو غايبان ناضي فاش يشري البرودوي ديالك.

👈 Action

وصلنا للمعقول.. الكليان دابا راه "موارمي" مزيان، فما تخليهش يبرد! غتقول ليه:

"هاد القوامج بقاو فيهم حبات قلال، ولا بغيتي ديالك طير بيها دابا. غي كليكي هنا وتوصلك تال باب الدار."

هادي هي المرحلة اللخرة وأهم مرحلة فهاد العملية، خاصك تخدم كاع المحفزات النفسية اللي دوينا عليها فالپوست اللي فات لي غي خلو لكليان يشري من عندك نتا وماشي من عند واحد آخر.

كخلاصة "عايدة" أو AIDA:

هو موديل تسويقي كلاسيك، مهم ليك تعرفو كميديا باير، وكيتكون من 4 ديال المراحل:

·       A (Attention): خطف الانتباه ديال الكليان بالإشارة لـ "المشكل" اللي كايعصبو.

·       I (Interest): وريه بلي نتا "حرايفي" وعندك حل ذكي وجديد.

·       D (Desire): خليه يتخيل راسو "واعر" فاش يلبس البرودوي ديالك.

·       A (Action): قول ليه "شنو يدير دابا" باش ميبقاش متردد ويشري من عندك.

ويلا وصلة لهنا راك ناضي متنساش تبان لتحت فالكمونترات ,,,,تحياتي نشوفكم فالبوست الجاي 🐱‍👤